18 އެޕްރީލް 2025 ދުވަހުގެ ހެނދުނުގެ ވަގުތެއްގައި، ޒަޚަމްތަކަކާއެކު ޒުވާނަކު މާލޭ ގެއެއްގެ ފުރާޅުމަތީގައި އޮތްވައި ފެނިފައިވާ މައްސަލާގައި ގ. އެރިޔަދޫ، ރައުދު އަޙްމަދު ޛިލާލްގެ މައްޗަށް ދަޢުވާކުރުމަށް 4 ޖޫން 2025 ގައި ކްރިމިނަލް ކޯޓަށް ހުށަހަޅައިފީމެވެ. 

ދަޢުވާ: ދިވެހިރާއްޖޭގެ ޤާނޫނުލްޢުޤޫބާތު (ޤާނޫނު ނަންބަރު: 2014/9) ގެ 618 ވަނަ މާއްދާގެ ދަށުން، އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއްނެތި، އެހީތެރިކަން ފޯރުކޮށްނުދިނުމުގެ ކުށުގެ ދަޢުވާ.

ދަޢުވާކުރާ ސަބަބު: ރައުދު އަހްމަދު ޛިލާލް، 18 އެޕްރީލް 2025 ދުވަހު 04:54 އެހައިކަށްހައިއިރު ހ. ފެންޓެނޯއީ ގޭގެ 9 ވަނަ ފަންގިފިލާގެ ސިޑި ގޮޅީގައި ހުންނަ ފެން ލައިޓުން (ކުޑަދޮރަކުން) ހ. މިޓާޒް ގޭގެ ފުރާޅު މައްޗަށް އަންހެނަކު (ނަން އުނިކުރެވިފައި) ވެއްޓުނުކަން އެނގިހުރެ، އޭނާއަށް އެހީތެރިވެދީފައި ނުވާތީއާއި، އޭނާއަށް އެހީތެރިކަން ހޯދުމަށް އެދި ކަމާ ގުޅުންހުރި އެއްވެސް އިދާރާއަކަށް ރިޕޯޓުކޮށްފައިނުވާތީ.

އަސާސީ އަދަބު: 1 މަހާއި 6 ދުވަހަށް ޖަލަށްލުން.

* މީހެއްގެ މައްޗަށް ޖިނާއީ ދަޢުވާއެއް  އުފުލުމުގެ މާނައަކީ އޭނާ ކުށްވެރިވުމެއް ނޫނެވެ. ދަޢުވާ ކޯޓަށް ހުށަހަޅަނީ، މައްސަލައިގައި ލިބިފައިވާ ހެކި ޤަރީނާއަށް ބަލައި، ދަޢުވާ ސާބިތުކޮށްދެވޭ މިންވަރަށް ހެކި ލިބިފައިވާކަމަށް ޕްރޮސިކިއުޓަރ ޖެނެރަލަށް ފެނިވަޑައިގަތުމުންނެވެ. ޤާނޫނުއަސާސީގެ 51 ވަނަ މާއްދާގެ (އ) ގައި، އެ މީހަކު ކުށެއްކޮށްފިކަން، އެކަށީގެންވާ މިންވަރެއްގެ ޝައްކެއްނެތި، ޝަރީޢަތުގައި ސާބިތުނުކުރެވޭ ނަމަ އެ މީހަކީ ކުށެއް ނެތް މީހަކު ކަމުގައި ބެލުމުގެ ޙައްޤު ލިބިގެންވާކަމަށް ބަޔާންކޮށްފައިވެއެވެ.

31 ޖަނަވަރީ 2024 ދުވަހުގެ ހެނދުނުގެ ވަގުތެއްގައި ޕްރޮސިކިއުޓަރ ޖެނެރަލްގެ މަޤާމުގައި ހުންނެވި އަލްއުސްތާޛް ޙުސައިން ޝަމީމަށް ނުރައްކާތެރި ހަތިޔާރު ބޭނުންކޮށްގެން ހަމަލާދީ ޒަޚަމްކޮށްލާފައިވާ މައްސަލާގައި 7 (ހަތެއް) މިހެއްގެ މައްޗަށް ކްރިމިނަލް ކޯޓަށް ހުށަހެޅި ދަޢުވާތައް ސާބިތުނުވާކަމަށް އެ ކޯޓުން ނިންމެވި ނިންމެވުމާމެދު މި އޮފީހުން ހިތްހަމަނުޖެހޭތީ، އެ މައްސަލަ އިސްތިއުނާފުކުރުމަށް 26 މޭ 2025 ދުވަހު ދިވެހިރާއްޖޭގެ ހައި ކޯޓަށް ހުށަހަޅައިފީމެވެ.

ކޮންޓްރޯލަރ އޮފް އިމިގްރޭޝަން މުޙައްމަދު ޝަމްއާން ވަޙީދާއި، މޯލްޑިވްސް އިމިގްރޭޝަންގެ މުވައްޒަފުންތަކެއް މަޤާމުގެ ނުފޫޒު ނަހަމަ ގޮތުގައި ބޭނުންކޮށްގެން ބިދޭސީ މަސައްކަތްތެރިގެ އަތުން ނާޖާއިޒް މަންފާ ހޯދަމުންދާ ކަމަށް ތުހުމަތު ކުރެވޭ މައްސަލާގައި އަންނަނިވި ދަޢުވާތައް ކުރުމަށް 25 މޭ 2025 ދުވަހު ކްރިމިނަލް ކޯޓަށް ހުށަހަޅައިފީމެވެ.

ކޮންޓްރޯލަރ އޮފް އިމިގްރޭޝަންގެ މަޤާމުގައި ހުރި ގ. ލިޓޯނިޔާ، މުޙައްމަދު ޝަމްޢާން ވަޙީދުގެ މައްޗަށް:

1. ދިވެހިރާއްޖާގެ ޤާނޫނުލްޢުޤޫބާތުގެ 213 ވަނަ މާއްދާއާއި، އެ ޤާނުނުގެ 30 ވަނަ މާއްދާއަށް ރިޢާޔަތްކޮށް، ފޭރުމުގައި ބައިވެރިވުމުގެ ކުށުގެ ދަޢުވާ.

2. ދިވެހިރާއްޖޭގެ ޤާނޫނުލްޢުޤޫބާތުގެ 513 ވަނަ މާއްދާގެގެ ދަށުން ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދަޢުވާ.

3. މަނީ ލޯންޑްރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނުގެ 53 ވަނަ މާއްދާގެ ދަށުން މަނީ ލޯންޑްރިންގގެ ދަޢުވާ.

މުޙައްމަދު ޝަމްޢާން ވަޙީދުގެ މައްޗަށް މި ދަޢުވާތައް ކޮށްފައިވާނީ، މޯލްޑިވްސް އިމިގްރޭޝަންގައި ޢަމަލުކުރާ ޢާންމު އުޞޫލާ ޚިލާފަށް، ކޮންޓްރޯލަރގެ ބިއުރޯގައި މަސައްކަތްކުރާ މުވައްޒަފުންތަކެއް ފޮނުވައިގެން 11 މާރިޗު 2025 ދުވަހުގެރޭގެ ވަގުތެއްގައި ބިދޭސީންތަކެއް ދިރިއުޅޭ ގެއަކަށް "އިމިގްރޭޝަން ޗެކް" އަކަށް ކަމަށް ބުނެ ވަދެގަނެ، އެތަނުގައި ހުރި ބަނގްލަދޭޝްގެ ރައްޔިތެއްކަމަށްވާ މައިނުއްދީން، 530،000 (ފަސްލައްކަ ތިރީސްހާސް) ރުފިޔާއާއެކު އިމިގްރޭޝަންގެ ބެލުމުގެ ދަށަށް ގެންގޮސް، މައިނުއްދީން ދޫކޮށްދިނުމަށް އެދި އޭނާގެ ސްޕޮންސަރުގެ ނަމުގައި ޞައްޙަ ނޫން ސިޓީއެއް ހުށަހެޅިތާ ކުޑަ ވަގުތުކޮޅެއްގެ ތެރޭގައި މައިނުއްދީން ބަންދުން ދޫކޮށްލުމަށް ޝަމްޢާން އެންގުމުން، ކޮންޓްރޯލަރގެ ބިއުރޯގައި މަސައްކަތްކުރަމުން ދިޔަ ގ. ހެޕީސައިޑް، އިބްރާހީމް އަޙްމަދު، މޯލްޑިވްސް އިމިގްރޭޝަންގައި ބޭނުންކުރަމުން ދިޔަ ކާރަކަށް މައިނުއްދީން އަރުވައިގެން ގެންދިޔަ ވަގުތު، އޭނާގެ އަތުގައި ހުރި ފައިސާގެ ތެރެއިން 500،000 (ފަސް ލައްކަ) ރުފިޔާ އަތުލުމަށް ޝަމްޢާން، އިބްރާހީމް އަޙްމަދަށް އަންގާފައިވާތީއާއި، މީނާ އެންގި ގޮތަށް އެފައިސާ މައިނުއްދީން އަތުން އަތުލުމުން، އެ ފައިސާގެ ތެރެއިން 400،000 (ހަތަރު ލައްކަ) ރުފިޔާއާ ޝަމްޢާން ޙަވާލުވެ، އެ ފައިސާ ޝަމްޢާންގެ އަތުގައި ބެހެއްޓުމަށްފަހު، ހަމަ އެދުވަހު އެ ފައިސާގެ ތެރެއިން ބައެއް ބޭނުންކޮށްގެން މީނާގެ ނަމުގައި ނަގާފައިވާ 02 (ދޭއް) ސްޓޫޑަންޓް ލޯންއަކަށް ފައިސާ ދައްކާފައިވާތީ.

މި ދަޢުވާތަކާ ގުޅިގެން ގުޅިގެން ގެއްލުމުގެ ބަދަލުގެ ގޮތުގައި މައިނުއްދީން އަށް 500،000 (ފަސްލައްކަ) ރުފިޔާ އަދި ދައުލަތަށް އިތުރު 400،000 (ހަތަރު ލައްކަ) ރުފިޔާ މުޙައްމަދު ޝަމްޢާން ވަޙީދު އަތުން ނަގައިދިނުމަށް ކޯޓުގައި އެދިފައިވާނެއެވެ. 

އިމިގްރޭޝަން އޮފިސަރ ގ. ހެޕީސައިޑް، އިބްރާހީމް އަޙްމަދުގެ މައްޗަށް:

1. ދިވެހިރާއްޖޭގެ ޤާނޫނުލްޢުޤޫބާތުގެ 213 ވަނަ މާއްދާގެ ދަށުން ފޭރުމުގެ ކުށުގެ ދަޢުވާ.

މި ދަޢުވާކޮށްފައިވަނީ އިސްވެ ދެންނެވުނު ޙާދިސާގައި މައިނުއްދީންއަތުން ފައިސާ ފޭރިގަނެފައިވަނީ މީނާކަމުގައިވާތި.

2. ދިވެހިރާއްޖޭގެ ޤާނޫނުލްޢުޤޫބާތު) ގެ 211 ވަނަ މާއްދާގެ (ހ) ގެ ދަށުން އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ ދަޢުވާ.

މި ދަޢުވާ ކޮށްފައިވާނީ އިސްވެ ދެންނެވުނު "އިމިގްރޭޝަން ޗެކް" އޮޕަރޭޝަން ތެރޭގާއި، އެތަނުގައި ހުރި ކަބަޑެއްގެ ތެރޭގައި ހުރި ބަނގްލަދޭޝްގެ ރައްޔިތެއްކަމަށްވާ އަބޫ ލަޔެސް މިއާގެ ފައިސާތަކުގެ ތެރެއިން 5000 (ފަސްހާސް) އެމެރިކާ ޑޮލަރު މީނާ ނަގާފައިވާތީ.

3. ދިވެހިރާއްޖޭގެ ޤާނޫނުލްޢުޤޫބާތުގެ 513 ވަނަ މާއްދާގެގެ ދަށުން ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދަޢުވާ.

މި ދަޢުވާކޮށްފައިވާނީ އިސްވެ ދެންނެނުވު ޙާދިސާގައި އިމިގްރޭޝަންގެ ބެލުމުގެ ދަށަށް ގެންދެވުނު މައިނުއްދީން، އިމިގްރޭޝަން ބަންދުން ދޫކޮށްލުމަށް ޞައްޙަނޫން އީމެއިލްއެއްކޮށްފައިވަނީ މީނާކަމަށްވާތީއާއި، އެ ޙާދިސާގައި މީނާގެ ރަސްމީ ޙައިޞިއްޔަތު ނަހަމަގޮތުގައި ބޭނުންކޮށްފައިވާތީ.

4. މަނީ ލޯންޑްރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނުގެ 53 ވަނަ މާއްދާގެ ދަށުން މަނީ ލޯންޑްރިންގއަށް މަގުފަހިކޮށްދިނުމުގެ ކުށުގެ ދަޢުވާ.

މި ދަޢުވާކޮށްފައިވާނީ، އިސްވެ ދެންނެވުނު ޙާދިސާގައި މީނާ މައިނުއްދީން އަތުން ފޭރިގަތް ފައިސާ ޝަމްޢާން ވަޙީދުއާ ޙަވާލުކޮށް، އޭގެތެރެއިން 100،000 (އެއްލައްކަ ދިވެހި ރުފިޔާ) މީނާ އަތުގައި ބަހައްޓާފައިވާތީ.

މި ދަޢުވާތަކާ ގުޅިގެން ލިބުނު ގެއްލުމުގެ ބަދަލުގެ ގޮތުގައި، މައިނުއްދީންގެ އަތުން ފޭރިގަނެފައިވާ 500،000 (ފަސްލައްކަ ދިވެހި ރުފިޔާ) އަށްވާ ބަދަލު މައިނުއްދީންއަށް ނަގައިދިނުމަށާއި، އެ ފައިސާގެ ތެރެއިން މީނާ އަމިއްލައަށް ނަގާފައިވާ 100،000 (އެއްލައްކަ ރުފިޔާ) ދައުލަތަށް ނަގައިދިނުމަށާއި، އަބޫ ލަޔެއް އަތުން "ވަގަށް" ނަގާފައިވާ 5000 (ފަސްހާސް) އެމެރިކާ ޑޮލަރު އަބޫ ލަޔެސްއަށް ނަގައިދިނުމަށް އެދިފައިވާނެއެވެ.

އިމިގްރޭޝަން އޮފިސަރ ގ. ބުރުނި، މޫނިމާގެ، މުޙައްމަދު އަލްސަން އިސްމާޢީލްގެ މައްޗަށް:

1. ދިވެހިރާއްޖޭގެ ޤާނޫނުލްޢުޤޫބާތުގެ 513 ވަނަ މާއްދާގެގެ ދަށުން ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދަޢުވާ.

މި ދަޢުވާކޮށްފައިވާނީ އިސްވެ ދެންނެވުނު "އިމިގްރޭޝަން  ޗެކް" އޮޕަރޭޝަންގައި މީނާ ބައިވެރިވެފައިވާތީ.

ގ. ހެޕީސައިޑް، ޙަސަން ސެހެޝާންގެ މައްޗަށް:

1. ދިވެހިރާއްޖާގެ ޤާނޫނުލްޢުޤޫބާތުގެ 213 ވަނަ މާއްދާއާއި، އެ ޤާނުނުގެ 30 ވަނަ މާއްދާއަށް ރިޢާޔަތްކޮށް، ފޭރުމުގައި ބައިވެރިވުމުގެ ކުށުގެ ދަޢުވާ.

މި ދަޢުވާކޮށްފައިވަނީ، އިސްވެ ބަޔާންކޮށްފައިވާ ޙާދިސާގައި މައިނުއްދީން އަތުން 500،000 (ފަސްލައްކަ) ރުފިޔާ ފޭރިގަތުމުގައި މީނާ ބައިވެރިވެފައިވާތީ.

2. ދިވެހިރާއްޖޭގެ ޤާނޫނުލްޢުޤޫބާތުގެ 513 ވަނަ މާއްދާގެގެ ދަށުން ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގައި ބައިވެރިވުމުގެ ކުށުގެ ދަޢުވާ. 

މި ދަޢުވާކޮށްފައިވަނީ، އިސްވެ ބަޔާންކޮށްފައިވާ ޙާދިސާގައި މައިނުއްދީން އަތުން 500،000 (ފަސްލައްކަ) ރުފިޔާ ފޭރިގަތުމުގައި އިމިގްރޭޝަން އޮފިސަރ އިބްރާހީމް އަޙްމަދުގެ ރަސްމީ ޙައިޞިއްޔަތު ނަހަމަ ގޮތުގައި ބޭނުންކުރުމުގައި މީނާ ބައިވެރިވެފައިވާތީ.

ސީނިއަރ އިމިގްރޭޝަން އޮފިސަރު މ. ހަޒާރީވިލާ، އަޙްމަދު ލައްސާންގެ މައްޗަށް:

1. ދިވެހިރާއްޖޭގެ ޤާނޫނުލްޢުޤޫބާތުގެ 213 ވަނަ މާއްދާގެ ދަށުން ފޭރުމުގެ ކުށުގެ ދަޢުވާ.

މި ދަޢުވާކޮށްފައިވަނީ، އިސްވެ ބަޔާންކޮށްފައިވާ ޙާދިސާގައި މައިނުއްދީން އަތުން 500،000 (ފަސްލައްކަ) ރުފިޔާ ފޭރިގަތުމުގައި މީނާ އެތަނުގައި ހުރެ، އެކުށުގައި ޢަމަލީގޮތުން ބައިވެރިވެފައިވާތީ.

2. ދިވެހިރާއްޖޭގެ ޤާނޫނުލްޢުޤޫބާތުގެ 513 ވަނަ މާއްދާގެގެ ދަށުން ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދަޢުވާ.

މި ދަޢުވާކޮށްފައިވާނީ އިސްވެ ދެންނެވުނު "އިމިގްރޭޝަން  ޗެކް" އޮޕަރޭޝަންގައި މީނާ ބައިވެރިވެފައިވާތީއާއި، މައިނުއްދީން އަތުން 500،000 (ފަސްލައްކަ) ރުފިޔާ ފޭރިގަތުމުގައި މީނާގެ ރަސްމީ ޙައިޞިއްޔަތު ނަހަމަ ގޮތުގައި ބޭނުންކޮށްފައިވާތީ.

މި މައްސަލައިގައި ހެކިބަސްދޭން ތިބި މީހުންނަށް ނުފޫޒުފޯރުވުމުގެ އިޙްތިމާލު އޮތުމުން،  މުޙައްމަދު ޝަމްޢާން ހުރީ ކްރިމިނަލް ކޯޓުގެ އަމުރެއްގެ ދަށުން ޝަރީޢަތް ނިމެންދެން ބަންދުގައެވެ. މި ދަޢުވާތައް ސާބިތުވެއްޖެނަމަ މުޙައްމަދު ޝަމްޢާން ވަޙީދުގެ މައްޗަށް މަދުވެގެން 9 އަހަރާއި 9 މަހާއި 18 ދުވަހުގެ ޖަލު ޙުކުމެއް އަންނާނެއެވެ. 

* މީހެއްގެ މައްޗަށް ޖިނާއީ ދަޢުވާއެއް  އުފުލުމުގެ މާނައަކީ އޭނާ ކުށްވެރިވުމެއް ނޫނެވެ. ދަޢުވާ ކޯޓަށް ހުށަހަޅަނީ، މައްސަލައިގައި ލިބިފައިވާ ހެކި ޤަރީނާއަށް ބަލައި، ދަޢުވާ ސާބިތުކޮށްދެވޭ މިންވަރަށް ހެކި ލިބިފައިވާކަމަށް ޕްރޮސިކިއުޓަރ ޖެނެރަލަށް ފެނިވަޑައިގަތުމުންނެވެ. ޤާނޫނުއަސާސީގެ 51 ވަނަ މާއްދާގެ (އ) ގައި، އެ މީހަކު ކުށެއްކޮށްފިކަން، އެކަށީގެންވާ މިންވަރެއްގެ ޝައްކެއްނެތި، ޝަރީޢަތުގައި ސާބިތުނުކުރެވޭ ނަމަ އެ މީހަކީ ކުށެއް ނެތް މީހަކު ކަމުގައި ބެލުމުގެ ޙައްޤު ލިބިގެންވާކަމަށް ބަޔާންކޮށްފައިވެއެވެ.

ދިވެހިރާއްޖޭގައި ފުރަތަމަ ފަހަރަށް ބޭއްވޭ ޤައުމީ ފެންވަރުގެ ކުޑަކުދިންގެ ޢަދުލުގެ މަހާސިންތާ، "ނޭޝަނަލް ޖުވެނައިލް ޖަސްޓިސް ކޮންފަރެންސް 2025" ފަށައިފިއެވެ.

މި ކޮންފަރެންސާބެހޭ އެންމެހައި މަޢުލޫމާތު ކޮންފަރެންސް ވެބްސައިޓް އިން ފެނިވަޑައިގަންނަވާނެއެވެ.

ނޭޝަނަލް ޖުވެނައިލް ޖަސްޓިސް ކޮންފަރެންސްއަށް ޚާއްޞަ ވެބްސައިޓެއް ލޯންޗުކޮށްފިއެވެ.

މި މޭ މަހުގެ 10 އިން ފެށިގެން 12 އަށް ބޭއްވުމަށް ހަމަޖެހިފައިވާ ނޭޝަނަލް ޖުވެނައިލް ޖަސްޓިސް ކޮންފަރެންސްއާގުޅޭ ހުރިހާ މަޢުލޫމާތެއް އެއް ތަނަކުން ބެލޭނެ އިންތިޒާމު ހަމަޖެއްސުމަށްޓަކައި ކޮންފަރެންސްއަށް ޚާއްޞަ ވެބްސައިޓެއް ލޯންޗުކޮށްފީމެވެ.

މި ވެބްސައިޓްގެ އެޑްރެހަކީ: https://pgoffice.gov.mv/njjc2025

މި ވެބްސައިޓް ފަރުމާކޮށްފައިވަނީ ކޮންފަރެންސްގެ ޑިޒައިން ޕާރޓްނަރ ލޫޕްކްރާފްޓާއި، މި އޮފީހުގެ އައިސީޓީ ސެކްޝަން ގުޅިގެންނެވެ. 

މި ވެބްސައިޓުގައި ކޮންފަރެންސަށް ހުށަހެޅޭ ފަންނީ ކަރުދާސްތަކާއި، ޕެނަލް ޑިސްކަޝަންތަކުގެ މަޢުލޫމާތާއި، ކީ-ނޯޓް ސްޕީކަރުންގެ މަޢުލޫމާތާއި، ކޮންފަރެންސާގުޅޭ އެހެނިހެން މަޢުލޫމާތު ހިމެނޭނެއެވެ.

މި ވެބްސައިޓް ފަރުމާކޮށްފައިވާނީ، ކޮންފަރެންސް ނިމުމަށްފަހުވެސް، ކޮންފަރެންސްގައި މަޝްވަރާކުރެވޭ ކަންކަމާގުޅިގެން ކުރެވޭ މަސައްކަތްތަކުގެ ފަހުގެ މަޢުލޫމާތު ހިމެނޭ ގޮތަށެވެ. 

ނޭޝަނަލް ޖުވެނައިލް ޖަސްޓިސް ކޮންފަރެންސް 2025 ގެ މީޑިއާ ޕާރޓްނަރަކަށް ޕަބްލިކް ސަރވިސް މީޑިއާ ހަމަޖައްސައިފިއެވެ. 

މިކަމާ ގުޅޭ އެއްބަސްވުމުގައި ޕްރޮސިކިއުޓަރ ޖެނެރަލްގެ އޮފީހުގެ ފަރާތުން ސޮއިކުރެއްވީ ޑިރެކްޓަރ ޖެނެރަލް އާމިނަތު ވަޙީދާއެވެ. އަދި ޕަބްލިކް ސަރވިސް މީޑިއާގެ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރ ޢަބްދުالله ޔާމީންއެވެ. 

މި އެއްބަސްވުމުގެ ދަށުން މި ކޮންފަރެންސް ޕްރޮމޯޓްކުރުމުގައި ޕީ.އެސް.އެމުން އެހީތެރިވުމާއި، ކޮންފަރެންސްގެ ބައެއް ބައިތައް ޕީ.އެސް.އެމްގެ ޗެނަލްތަކުން ވަގުތުން ދުރަށް ދެއްކުމަށް ހަމަޖެހިފައިވެއެވެ. 

18 އެޕްރީލް 2025 ދުވަހުގެ ހެނދުނުގެ ވަގުތެއްގައި، ޒަޚަމްތަކަކާއެކު ޒުވާނަކު މާލޭ ގެއެއްގެ ފުރާޅުމަތީގައި އޮތްވައި ފެނިފައިވާ މައްސަލައާ ގުޅިގެން އަންނަނިވި އިރުޝާދުތައް 24 އެޕްރީލް 2025 ދުވަހު ދިވެހި ފުލުހުންގެ ޚިދުމަތަށް ދީފައިވާނެއެވެ.

މި ޙާދިސާއާ ގުޅިގެން 24 އެޕްރީލް 2025 ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި، މައްސަލާގައި އަނިޔާލިބުނު މީހާގެ ޒާތީ މަޢުލޫމާތާއި، އަނިޔާލިބުނު މީހާ ފެންނަ ފޮޓޯއާއި ވީޑިއޯ ޢާންމުކޮށްފައިވާތީ، އަނިޔާލިބުނު މީހާގެ އަބުރާއި ކަރާމާތަށް އުނިކަން އަންނާނެފަދަ އެއްވެސް މަޢޫލޫމާތެއް އިތުރަށް ހާމަނުކުރުމަށާއި، މިފަދަ ކަންކަން ތަކުރާރުނުވާނެ ގޮތުގެ މަތިން ފުލުހުންގެ މަސައްކަތްތައް ބައްޓަންކުރުމަށް ދަންނަވާފައިވާނެއެވެ.

އަދި، މި މައްސަލައިގެ ތަޙުޤީޤަށް ހާޒިރުކުރި ބައެއް މީހުން، މަސްތުގެ ޙާލަތުގައި ތިބިކަމަށް ތުހުމަތުކުރެވުނު ނަމަވެސް، އެމީހުންގެ ކުޑަކަމުދާތަކެތި ދިނުމަށް އިންކާރުކޮށްފައިވާތީ، ކުޑަކަމުދާތަކެތި ނެގުމުގައި ޤާނޫނީ ހުރަސްތަކެއް ކުރިމަތިވެފައިވާކަމަށް އެ ނޫސްވެރިންގެ ބައްދަލުވުމުގައި ފުލުހުން ފާހަގަކޮށްފައިވާތީ، ޤާނޫނީ އުޞޫލުތަކުގެ ތެރެއިން މީހަކަށް ކުޑަކަމުދާތަކެތި ދޭން އަންގައި، އެތަކެތި ނުދީފިނަމަ، ކުޑަކަމުދާތަކެތި ދޭން އިންކާރުކުރުމުގެ މައްސަލައެއް ގޮތުގައި އެކަން ތަޙުޤީޤުކުރުމަށް މި އޮފީހުން އަންގާފައިވާނެއެވެ.

އަދި، ޖިނާއީ ތަޙުޤީޤުތަކާ ގުޅިގެން މަޢުލޫމާތު ހާމަކުރުމުގައި ހަމަހަމަކަމާއެކު، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީން ފަރުދުންނަށް ކަށަވަރުކޮށްދީފައިވާ ޙައްޤުތަކަށް އުނިކަން ނާންނާނެފަދަ ގޮތަކަށް ޢަމަލުކުރުމަށާއި، ޖިނާއީ ކުށްތަކާ ގުޅިގެން މަޢުލޫމާތު ޢާންމުކުރުމުގައި އޮޅުންނާރާނެގޮތަށް، ހާމަކަމާއެކު، ފުރިހަމަ މަޢުލޫމާތު ފޯރުކޮށްދިނުމަށާއި، ތަޙުޤީޤަށް ހުރަސްނޭޅޭނެ ގޮތަށް މަޢުލޫމާތު ހާމަކުރުމަށް ދަންނަވާފައިވާނެއެވެ.

މީގެ އިތުރުން، މި މައްސަލަ ތަޙުޤީޤުކުރުމުގައި އެއްވެސް އޮފިސަރެއްގެ ފަރާތުން މިހާތަނަށް އެއްވެސް އިޙުމާލެއް އަދި އިޖުރާއަތްތަކާ ޚިލާފު ޢަމަލެއް ކޮށްފައިވޭތޯ ބަލައި، އެކަމާ ގުޅިގެން އަޅަންޖެހޭ ފިޔަވަޅުތައް އެޅުމަށްވެސް އަންގާފައިވާނެއެވެ.

މި މައްސަލައިގެ ތަޙުޤީޤު ހިނގަމުންދާ ގޮތާމެދު ޢާންމުންގެ ހުރި ޝަކުވާތައް މި އޮފީހަށް ހުށަހެޅުއްވުމުން، އެ ޝަކުވާތަކާމެދުވެސް، ޤާނޫނުއަސާސީގެ 223 ވަނަ މާއްދާގެ (ޅ) ގެ ދަށުން އަޅަންޖެހޭ ފިޔަވަޅުތައް މި އޮފީހުން އަޅަމުން ގެންދާނަމެވެ.

އަދި، ޖިނާއީ މައްސަލަތަކާ ގުޅޭ މަޢުލޫމާތު ފެތުރުމުގައި، ނޫސްވެރިންނާއި، ޢާންމު ރައްޔިތުންވެސް މައްސަލާގައި އަނިޔާލިބޭ މީހުންގެ ޙައްޤުތަކަށް އުނިކަން ނާންނާނެގޮތަށް ޢަމަލުތައް ބެހެއްޓުމަށް އިލްތިމާސްކުރަމެވެ.

ދިވެހިރާއްޖޭގެ ކޯޓެއްގައި ފުރަތަމަ ފަހަރަށް ވިކްޓިމް އިމްޕެކްޓް ސްޓޭޓްމަންޓް ހުށަހެޅުމުގެ ފުރުޞަތު ދީފިއެވެ.

ކުޑަކުއްޖެއްގެ ޢުމުރުން 8 އަހަރުން ފެށިގެން 18 އަހަރާ ހަމައަށް (10 އަހަރު ދުވަސް ވަންދެން) އެކި ފަހަރު މަތިން އެކުއްޖާއަށް ޖިންސީ ގޯނާ ކުރި މީހެއްގެ މައްޗަށް ކުށް ސާބިތުވެ 54 (ފަންސާސް ހަތަރެއް) އަހަރަށް ޖަލަށްލުމަށް 21 އެޕްރީލް 2025 ދުވަހު ހުޅުމާލެ މެޖިސްޓްރޭޓް ކޯޓުން ޙުކުމްކޮށްފައިވެއެވެ.

ވިކްޓިމް އިމްޕެކްޓް ސްޓޭޓްމަންޓަކީ ކުށެއްގެ ސަބަބުން ތަހައްމަލު ކުރަންޖެހުނު ނަފްސާނީ އަދި ޖިސްމާނީ އަނިޔާއާއި، މައްސަލައިގެ ހާދިސާގެ ސަބަބުން ދިރިއުޅުމަށް ކުރި އަސަރު ކޯޓުގައި ބަޔާންކުރުމަށް މައްސަލާގައި އަނިޔާލިބުނު ފަރާތުން ކޯޓުގައި ހުށަހަޅާ ބަޔާނެވެ. 

މި މައްސަލާގައި އަނިޔާ ލިބުނު ކުއްޖާ ވަނީ މި އޮފީސް މެދުވެރިކޮށް ކޯޓަށް ބަޔާނެއް ހުށަހަޅައި، މި މައްސަލައިގެ ޙާދިސާގެ ސަބަބުން ކުއްޖާގެ ދިރިއުޅުމަށް ކުރި އަސަރު ވަރަށް އަސަރާއެކު ބަޔާންކޮށްދީފައެވެ. މި ބަޔާން ކޯޓުގައި އިއްވަވައިދެއްވާފައިވަނީ ޕަބްލިކް ޕްރޮސިކިއުޓަރ އަލްއުސްތާޛާ އަލްމާސް މުބާރިކެވެ.

ޖިނާއީ މައްސަލަތަކުގެ ތެރެއިން ވިކްޓިމުން ހިމެނޭ މައްސަލަތަކުގައި، ކުށް ސާބިތުކުރުމަށް ކުރާ މަސައްކަތުގެ އިތުރުން، މި އޮފީހުން އެންމެ ބޮޑު އިސްކަމެއްދޭ ކަމަކީ ވިކްޓިމުން، ބާރުވެރިކުރުވުމެވެ. ވިކްޓިމް އިމްޕެކްޓް ސްޓޭޓްމަންޓް ހުށަހެޅުމަކީ ވިކްޓިމުން ބާރުވެރިކޮށް، ވިކްޓިމުންނަށް ތަސައްލީ ހޯދައިދިނުމަށްޓަކައި ހުޅުވާލެވިފައިވާ މިނިވަން ދީމިޤްރާތީ މުޖުތަމަޢުތަކުގައި އަމަލުކުރާ އުޞޫލެކެވެ.

މި މައްސަލާގައި ކުށް ސާބިތުވުމަށްފަހު އަދަބު ކަނޑައެޅުމުގެ ކުރިން އަނިޔާލިބުނު ކުއްޖާއަށް ކޯޓުގައި އެކުއްޖާގެ ބަސް އިއްވުމުގެ ފުރުޞަތު ލިބިދިނުމަށް މި އޮފީހުން ކޯޓުގައި އެދުމުން، ކޯޓުން އެ ފުރުޞަތު ދެއްވާފައިވާތީ މި އޮފީހުން އެކަމަށް މަރުޙަބާ ކިޔަމެވެ. މި އޮފީހުން މިގެންދަނީ ޖިނާއީ ޢަދުލުގެ ނިޒާމުގެ ތެރެއިން ވިކްޓިމުންނަށް އޮތް ފުރުޞަތުތައް އިތުރަށް  ފަހިކޮށްދީ، ވިކްޓިމް-ސެންޓާރޑް ނިޒާމަކަށް މިސްރާބު ޖަހަމުންނެވެ.

މި މައްސަލައަކީ ކުޑަކުއްޖަކަށް ޖިންސީ ގޯނާ ކުރުމުގެ ހައްސާސް މައްސަލައަކަށް ވެފައި، އަނިޔާލިބުނު ކުއްޖާގެ މަޢުލޫމާތު ޙިމާޔަތްކުރުމުގެ ބޭނުމަށްޓަކައި ކުށްކުރި ފަރާތުގެ މަޢުލޫމާތު ހާމަކޮށްފައި ނުވަނީއެވެ.

ކުޑަކުދިންގެ ޢަދުލުގެ ޤައުމީ ފެންވަރުގެ މަހާސިންތާ "ނޭޝަނަލް ޖުވެނައިލް ޖަސްޓިސް ކޮންފަރެންސް 2025" މި މޭ މަހުގެ 10 އިން 12 އަށް ބޭއްވުމަށް ވަނީ ހަމަޖެހިފައެވެ.

މިއީ ކުޑަކުދިންގެ ޢަދުލުގެ ނިޒާމުގައި ހިމެނޭ ހުރިހާ އިދާރާތަކާއި، ގުޅުންހުރި މަދަނީ ޖަމިއްޔާތަކުގެ ބައިވެރިވުމާއެކު ކުރިއަށްގެންދާ ޤައުމީ ފެންވަރުގެ ފުރަތަމަ މަހާސިންތާއެވެ. 

މިއީ ޔުނިސެފްގެ އެހީތެރިކަމާއެކު މި އޮފީހުން އިންތިޒާމުކޮށްގެން ބާއްވާ މަހާސިންތާއެކެވެ. 

މި މަހާސިންތާ ބޭއްވުމުގެ މަޤްޞަދުތައް:

- ކުޑަކުދިންގެ ޢަދުލުގެ ނިޒާމުގައި ހުރި މައްސަލަތަކަށް ފަންނީ މަޝްވަރާގެ އަލީގައި ޙައްލު ހޯދުން.

- ކުޑަކުދިން ކުށްކުރުމާ ދުރުކުރުމަށްޓަކައި، މިހާރު ޢަމަލުކުރަމުންދާ އުޞޫލުތަކާއި، ނިޒާމަށް ގެންނަންޖެހޭ ބަދަލުތައް ދެނެގަތުން.

- ކުޑަކުދިންގެ ޢަދުލުގެ ނިޒާމުގައި ހިމެނޭ އިދާރާތަކާއި ޖަމިއްޔާތަކުގެ މެދުގައި އޮތް ގުޅުން އިތުރަށް ވަރުގަދަކޮށް ހަރުދަނާކުރުން.

މި މަހާސިންތާގައި ކުރެވޭ ފަންނީ މަޝްވަރާތަކާއި، ހުށަހެޅޭ ދިރާސީ ކަރުދާސްތަކުގެ އަލީގައި ޕޮލިސީ ރެކޮމަންޑޭޝަން ކަރުދާހެއް ތައްޔާރުކޮށް، އެކަންކަން ތަންފީޛްކުރުމަށް ދައުލަތުގެ ކަމާ ގުޅުންހުރި އިދާރާތަކަށް ހުށަހެޅުމަށް ހަމަޖެހިފައިވެއެވެ.