މިނިވަން މުއައްސަސާތަކުން ގުޅިގެން އިޖްތިމާޢީ އެކިއެކި ކަންކަން ކުރުމަށް އުފައްދާފައިވާ އާރޯ ޙަރަކާތުގެ އެންމެ ފުރަތަމަ އިވެންޓްކަމުގައިވާ އާރޯ ގަސްއިންދުމުގެ ޙަރަކާތުގައި ޕްރޮސިކިއުޓަރ ޖެނެރަލްގެ އޮފީހުގެ ފަރާތުން ބައިވެރިވެއްޖެއެވެ.
މިއަދު ހުޅުމާލޭގައި ކުރިއަށްދިޔަ މިޙަރަކާތުގައި، ޕްރޮސިކިއުޓަރ ޖެނެރަލްގެ އޮފީހުގެ ސާޅީހަށްވުރެ ގިނަ މުއައްޒަފުން ބައިވެރިވެ ގަސްއިންދާފައިވެއެވެ. މިއަދުގެ މިރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް އެންވަޔަރަމަންޓް އެންޑް އެނަރޖީ އަލްފާޟިލް ޠާރިޤް އިބްރާހީމް އެވެ. ބައިނަލްއަޤުވާމީ ތިމާވެށީގެ ދުވަހާ ގުޅުވައިގެން ހިންގި މިޙަރަކާތުގައި މިއަދު ވަނީ އާރޯގެ ބައިވެރިން ކަމުގައިވާ 15 މުއައްސަސާއިން 'ރާއްޖޭގެ މިނިވަން މުއައްސަސާތަކުން ޢަޒުމުކަނޑައަޅާ ތިމާވެށި އާރޯކުރުމުގެ އިޤުރާރު' ގައި ސޮއިކޮށްފައިވެއެވެ.
ޕްރޮސިކިއުޓަރ ޖެނެރަލްގެ އޮފީހުން މިއިޤުރާރުގައި ސޮއިކޮށްފައިވަނީ، އޮފީސް ހިންގެވުމާއި ޙަވާލުވެވަޑައިގެން ހުންނެވި ޑެޕިއުޓީ ޕްރޮސިކިއުޓަރ ޖެނެރަލް އަލްއުސްތާޛާ މަރްޔަމް ނިހާޔަތު އެވެ. މިއަދު ކުރިޔަށްދިޔަ މިޙަރަކާތް ނިންމާލީ ބައިވެރިވި ހުރިހާ ފަރާތްތަކަށް އިންތިޒާމުކުރެވިފައި އޮތް މާހެފުމަކުންނެވެ.
